Góð ráð til avvarðandi

Møguliga ert tú stúrin um, at ein av tínum nærmastu er bundin av spæli.

Tað kann vera maki tín, barn títt, vinur tín ella onkur annar, sum tú ert stúrin um. Tað kann vera torført at varnast, um ein persónur er bundin av spæli, tí fólk bera seg ógvuliga ymiskt – summi gerast troytt og mótleys, meðan onnur gerast viðkvom og ilsklig.

Tí er eingin svarlisti, men nøkur eyðkenni eru, sum vit vóna kunnu hjálpa tær at fáa greiðu á stúranini.

Hetta eru eyðkenni fyri ein, sum er bundin av spæli

• Brýtur avtalur og hvørvur.
• Steðgar við frítíðarvirksemi v.m.
• Kemur við umberingum og merkisverdum frágreiðingum.
• Er sera upptikin av spæli og úrslitum.
• Fortelur um vinning, ikki tap.
• Virkar stressað/ur og friðleys/ur.
• Er erkvisin og hevur stutt fjús.
• Hevur svingandi sinnalag.
• Avbyrgir seg og tykist í ringum lag.
• Broytir sovimynstur ella liggur í andvekri.

Fyri tann sum er spælbundin kann tað eisini hava fíggarligar avleiðingar. Tann spælbundni hevur møguliga eina óstøðuga fíggjarstøðu og eitt sera høgt forbrúk. Viðkomandi er duldarfullur og fjalir kontuavrit. Persónurin lænir pening og fær ikki goldið skuldina aftur ella tekur reiðan pening út frá einari felagskontu. Tað kann eisini vera, at viðkomandi javnt og samt tekur eykaarbeiði á seg.

Hvussu eigur tú at bera teg at?

• Ansa eftir tær sjálvum og styðja teg við onnur. Mong ganga einsamøll við sínum stúranum – tað er ikki haldgott í longdini.
• Fregnast um trupulleikarnar hjá viðkomandi, ið tú ert stúrin um. Ver tolin og skiljandi. Greið frá, hvussu teirra atferð ávirkar teg.
• Set orð á um at biðja um hjálp. Øll sum eru spælbundin kunnu søkja sær hjálp frá Center for Ludomani við at ringja á +45 70 11 18 10. Vit hava gjørt eina samstarvsavtalu við tey, sum ger, at hjálpin er ókeypis, dulnevnd og ikki krevur nakra ávísing frá tí almenna.
• Hav greitt og týðiligt samskifti og ver reglubundin yvirfyri viðkomandi, sum spælir. Tú skalt ikki góðtaka fleiri lygnir, umberingar og fíggjarligar trupulleikar.